WILLEMSTAD.- Durante di un rueda di prensa yamá pa Fundashon JAG i tambe Fundashon Alelimo a laga Prensa sera konosí un tiki mas djaserka ku e tumberonan hubenil den kontienda pa e título máksimo di Tumba Hubenil 2019, ku lo tuma lugá djasabra awor, 19 di yanüari, for di 4 or di atardi te ku 9 or di anochi na Kleine Werf.
Tambe a papia di e posibilidat pa vota pa bo faborito, ku lo garantisá un spòt den e finalistanan pa e di 2 ròndu. Pa mas informashon di e votamentu por subi e página di facebook di Tumba Hubenil 2019.
Durante dje rueda di prensa Giovanni Abath i Angelica Abath di Kara Productions a hasi entrega ofisial di e koronanan pa nos embahadornan di Karnaval.
E aña aki tur nos tumberonan, di dos finalista, promé finalista i ganadó lo risibí un obra di arte dediká na nos muchanan ku ta mustra e balentia pa subi e tarima i tambe lo ilustrá e perseveransia di nan. Esaki lo por inspirá nan pa mas apresio na arte i ku kisas por kondusí nan tambe pa drenta e mundu di arte.
A pone lus riba algun spònser grandi ku ainda ta kere den karnaval i prinsipalmente nos hóbennan ku ta Venequip i Lovers. E ofisina di Venequip tabata e sitio kaminda ku e rueda di prensa a tuma lugá. E gerente, Sergio Bitorina a indiká ku por spera mas sorpresa di Venequip durante di e festival i a ekspresá su sentimentu pa ku Karnaval, sperando ku mas empresa lo yuda pa asina engrandesé nos fiesta kultural.
Karchi entrada pa Festival di Tumba Hubenil ta kosta 10 florin pa mucha te ku 12 aña i 15 florin pa hende grandi. Karchinan ya ta optenibel na 24 uur uit de muur i serka tur partisipante.