WILLEMSTAD.- Ayera na Marieta Alberto School a tuma lugá e apertura di Siman di Kultura kaminda maestro i alumnonan a purba di duna nan ‘twist inovativo’ na nos balornan kultural i históriko. E tema dje aña aki tabata ‘Nos forma di kushina di ántes ku Konfó’, un forma simpel di kushina di ántes ku ta laga te awe un sabor diferente i úniko, kasi nostálgiko, na nos platonan krioyo. Sra. Altagracia Koster, direktora di Marieta Alberto School, semper pendiente pa buska apoyo pa yuda kita e ‘belo’ for di wowo di empresarionan ku te ainda no ke duna su alumnonan ku kaba skol un ‘fair chance’ pa traha den nos komunidat. Ta di lamentá ku komersiantenan i doñonan di trabou no ta duna e hóbennan un chèns den nos merkado laboral. Nan por masha hopi, apresiá i stimánan.