WILLEMSTAD.- Den un kombersashon ku ‘DEN E BEMBE’ a hiba ku Juni Juliet relashoná ku su proyekto di ‘JJ huntu ku Mr. Saab, Ompi Stefania i Ñaño Rosario’ nos a bin kai riba e tema ku nos historia musikal mester bai skol. Pa Juni Juliet e historia di nos baluartenan musikal mester bai skol pa e muchanan for di chikí siña konosé nos baluartenan i siña tur nan logronan den farándula lokal. Pa esaki ‘DEN E BEMBE’ ta kompletamente di akuerdo ku Juni basá riba e echo ku mester traha riba un kuríkulo pa skol sekundario tambe kaminda nos músika lokal ta risibí e atenshon nesesario i e hóben ta risibí formashon musikal di nos ritmonan lokal. Nos por sigui skibi masha punto ku ta sumamente importante pa nos desaroyo di farándula pero mester kuminsá na e base pa laga e hóben sera konosí ku nos músika lokal i siña ken tur ta nos baluartenan lokal. E historia musikal di Kòrsou ta asina grandi ku tin diferente género di músika ku nos tin baluartenan ku a meresé rekonosementu ku awor ta momentu pa kuminsá traha riba nos historia musikal pa skolnan di fundeshi i skol sekundario. Nos tin diferente historiadó musikal ku lo por ta di gran aporte pa desaroyo un kuríkulo pa ámbos nivel di estudio. Awe Juni Juliet a ekspresá su deseo, awor ta toka turno na nos instansianan kultural i edukativo pa duna oido na esaki. Manera Juni a bisa ‘Un rèspèt pa mi baluartenan’.