WILLEMSTAD.- E siman aki di djaluna, 9 pa djabièrnè 13 di aprel, Tele Aruba lo ta bibu ku 3 programa ‘Nos Mainta’ aki na Kòrsou. E programanan su meta ta pa promové Turismo, Kultura i Folklor di Kòrsou. E kompania ‘Priceless Moment Productions and Events’ di Kòrsou ta asistí Tele Aruba den e produkshon. For di fin di siman pasa e delegashon di Tele Aruba ta na Kòrsou, kaminda nan a realisá vários entrevista den kuadro di preparashon di e tremendo programanan ku lo keda transmití bibu i direkto for di Kòrsou riba djaluna, 9 di aprel 2018 for di Lanthùis Chobolobo di 9’or pa 11’or di mainta; djárason, 11 di aprel 2018 for di Lanthùis Doktersuin di 9’or pa 11’or di mainta i djabièrnè for di 13 aprel 2018 Mambo Boulevard / Madero di 9’or di mainta pa 12’or di mèrdia. Komo invitado den e programa aki lo tin entre otro Minister di Ekonomia i Turismo di Kòrsou Dr. Steven Martina i tambe representantenan di Curaçao Culinair 2018, Sr. Gregory Elias di Fundashon Bon Intenshon, Velas Latinoamérica Curaçao 2018, Roy Colastica, Gilbert i Noris Doran, Rei di Tumba 2018 Urvin Yano i vários otro invitado mas. E dos presentadónan di e programa aki ta Siomara Everon i Tito Doran. Aki na Kòrsou por sigui e transmishon via di e página di Facebook di Nos Mainta – Telearuba, Telearuba i tambe Priceless Moment Productions and Events. Tambe por download e app di Telearuba via di Appstore i/òf pa Android via di Playstore. Kòrsou e siman aki lo ta den spòtlait den e programa ‘Nos Mainta’ na Tele Aruba.