Pa: Peppie Sulvaran

WILLEMSTAD.- E empate kontra Costa Rica ta meresí i a pone nos den posishon pa yega buèlta final di Liga di Nashon di CONCACAF. Pero nos no tei ainda. Tur kos por pasa. Kòrsou ku 5 punto mester enfrentá Costa Rica dia 14 di novèmber awor den nos kas i mester saka un viktoria pa tene tur kos den nos mes man.

Aktualmente Costa Rica i Haiti tur dos tin 2 punto, ku Costa Rica ku un wega ménos hungá ku Kòrsou i Haiti. Un empate kontra Costa Rica so lo pone nos klasifikashon pa e buèlta final na yüni 2020 na peliger. Ta e kuater ganadónan di grupo so lo pasa. E peliger ta sinta ku si nos no gana di Costa Rica i por ehèmpel empatá òf pèrdè, e ‘Ticonan’ lo enfrentá Haiti den nan lastu wega na Costa Rica i lo ta un Haiti probablemente ya eliminá pa e  buèlta final.

Apesar ku nos a hunga hopi bon na Costa Rica, tin punto serio di preokupashon. Si nos no hinka gol na Kòrsou 14 di novèmber, kos lo kompliká pa nos. Mester buska Charlison Benschop ku ta den un gran momento ku Groningen den Eredivisie Ulandes i hasta a manda e talento di Ajax, fia na Groningen Kaj Sierhuis banki.

...Armando Obispo...

Di e kuater sentro delanteronan ku sa wòrdu invitá, sin duda, Benschop i Nigel Robertha (Levski Sofia) ta esnan di mas nivel i mas den forma. Rangelo Janga ta traha duru, pero un sentro delantero ta wòrdu husgá solamente riba un solo punto i esei ta su golnan, paso p’esei e ta den wega. Si nos no ta kibuká, Janga tin 5 wega sin anotá. Benschop i Robertha mester ke bin si. Realidat ta ku tur dos a wòrdu invitá, pero òf mester a sinta riba banki pa wak te hasta hungadó amatùr hunga promé ku nan, òf no a hunga mes. E riesgo ta, ku e ora ei, ku tur rason, nan ta duna preferensia na nan ekipo.

Benschop a hunga Eredivisie, Bundesliga i na nivel haltu na Fransia. E konosé gol i tin eksperensia. Nigel ta un gran talento, pero no ta bai yega selekshon Ulandes, pa e simpel motibu, ku pa e próksimo dies aña ningun hende no ta bai hunga promé ku Memphis Depay (Olympique Lyon), Donyell Malen (PSV) i Myron Boadou (AZ) kendenan ta talentonan èkstra ordinario, ku no por faya.

Mester aserka Benschop i diskutí di forma habrí e motibu dikon e no kier bin mas. Esei ta trabou di e kuerpo tékniko. Otro punto pa preokupá ta e hopi amatùrnan den selekshon. Riba e nivel aki no por mas. No tin sentido invitá hungadó ku ta train dos be pa siman pa hunga kontra profeshonal ku ta train dos be pa dia. Ku tur rèspèt, nos a saka resultado na Costa Rica, pasobra e team di nos tabata full prof riba tereno fo’i kuminsamentu te final. Awor aki no tin ningun espasio pa komplasé òf mantené hungadó pasobra nan tabata aden ora nos a hunga kontra e islanan chikí di Karibe. Nan no por yuda riba e nivel aki i nos ta limitá nos posibilidat pa hasi kambio.

...Giovanni Troupe...

Algun hungadó ku por keda invitá

Tur promé dies selekshon di CONCACAF ta full prof. Esei ta e realidat ku nos ta konfrontá awor. Pa e próksimo enkuentro, Lachman, Benschop i Antonia mester ta invitá na lugá di e amatùrnan. Tin hopi mas tambe den tapara, Floranus (Heerenveen), Troupée (Utrecht), Malasia (Feyenoord), Geertruida (Feyenoord) i Obispo (Vitesse), tur defensa, tampoko lo yega ‘Oranje’, pasobra Dumfries (PSV), Veldman (Ajax), Tete (Olympique Lyon), Zeefuik (Groningen), Haps (Feyenoord) i Klaiber (Utrecht) komo defensor riba ala, ya tin preferensia riba nan sea den nan ekipo òf den selekshon.

E puesto di defensa sentral den selekshon di Ulanda pa hopi aña lo ta di Van Dijk (Liverpool), de Ligt  (Juventus) i e hóben Schuurs (Ajax), lokual ta bai hasi praktikamente imposibel pa e sentralnan Obispo i Geertruida yega.

...Charlison Benschop...

Ta un trein yen di talento Kòrsou tin na Europa. Tin tambe Kevin Felida (Den Bosch) un bolante defensivo hóben i Tahith Chong (Manchester United). Apesar ku Tahith ta hopi talentoso, no ta sigur ku e tampoko lo yega selekshon Ulandes. Kaminda e ta hunga riba ala, tin talento mes hóben kuné, ku si ta hunga estelar òf regular den ekipo grandi i algun ku hasta ya a wòrdu invitá pa ‘Oranje’. Steven Bergwijn (PSV), Calvin Stengs (AZ), Justin Kluivert (Roma), Cody Gakpo (PSV), Depay mes ku tambe por hunga riba ala i otronan manera Steven Berghuis (Feyenoord) i Quincy Promes (Ajax).

Pa logra realisá e hungadónan aki, banda di éksito, mester tin un maneho profeshonal i un selekshon kaminda tin regla, órden i transparensia, si no bo ta pèrdè hungadó òf no ta haña hungadó òf ekipo ku lo ke koperá ku e selekshon. Asina so nos lo por yega Qatar. Kòrsou pabien i trabou tin!

......Sherel Floranus...