WILLEMSTAD.- Ayera tardi den sentro komersial SAMBIL e organisashon AMAK a presentá e proyekto ‘Nos rais Musikal’ den kuadro di selebrashon di nan 50 aniversario.
‘Nos rais Musikal’ lo ta un regalo na pueblo di Kòrsou i meta dje proyekto ta pa duna aporte i realse pa reskatá i reprodusí e propiedat musikal históriko di Kòrsou.
E proyekto “Nos rais musikal” ta un  evento, ku ta bai trese rekuerdonan masha positivo, di nos músika di añanan 30 pa 60.
Realisashon di e proyekto, “Nos rais  musikal” ta enserá hopi benefisio: 1. Pueblo ta bira konsiente di tin un propiedat kultural musikal riku; 2. Tantu e  músikonan hóben komo esnan aktivo ta realisá e balor agregá pa  konservá, apresiá i hasi uso di e repertorio  riku i variá na género di muzik di nos herensia kultural musikal, ku nos antepasadonan a interpretá; 3. E ta kontribuí na oumentá e sentimentu di balor propio; 4. Famianan di e baluartenan aki lo sinti nan mes orguyoso na momento ku nan  skucha e obranan musikal original den un bachi nobo i 5. Pa dokumentashon e proyekto “Nos rais Musikal” ta krea  vershonnan nobo, banda di esnan original ku lo sirbi,  pa dokumentashon di nos historia musikal.

Kontenido
Pa por realisá e proyekto aki, AMAK, Instituto pa Formashon Musikal a uni forsa, pa yega na e obranan musikal di nos antepasadonan. For di un kantidat di mas ku 100 obra musikal , a skohe un total di 22 komposishon, ku lo ser areglá pa Maestro Gedion Chandler, den un bachi nobo, pero manteniendo e originalidat mas tantu posibel.
E repertorio aki lo ser interpretá pa diferente kantantenan hóben i adulto, i e kompañamentu musikal lo ta na enkargo di Junior All Star Big Band.
Pa e okashon aki Junior  Star lo konsistí di e hóbennan ku ya ta forma parti di e orkesta, miéntras e sekshon di brass, lo konsistí di e mihó profeshonalnan, huntu ku e studiantenan di brass.
Aparte di e kantantenan di Junior All Star, lo tin tambe intérpretenan manera, Irving Luwi Jano, Henri B, Ramsey Frans, Wendy Jane Gomes, Melania van der Veen, Ruth Samson, Pastor Raul i algun kantante mas ku lo interpretá un òf mas komposishon.
E repertorio konsistí di  diferente komposishon, di e.o. Estrellas del Caribe, Lirico Antiano, San Jose, Jóvenes del Caribe, Kimo Candelaria, Happy Boys, Sexteto Gresssman i Típiko Sta. Rosa.

Lokalidat
E konsierto, “Nos Rais musikal” ta tuma lugá, djasabra 18 di ougùstùs den Curaçao Festival Center, e Sede di Amak i su músikonan.