WILLEMSTAD.- Djadumingu próksimo 7 di òktober,  lo tuma lugá e gran konsierto ‘Nos Rais Musikal’, ku AMAK ta ofresé pueblo di Kòrsou i su miembronan pa selebrá 50 aña di eksistensia.
Direktiva di AMAK ta sumamente agradesido na tur e artistanan di Kòrsou i den e kaso aki tambe di Aruba,  ku a koperá den un forma grandioso ku e Festival.
Direktiva di AMAK ke asentuá ku tur miembro ku tin nan karnèt bálido por bini ku nan partner,  pa presensiá e magno evento aki. Ensayonan a tuma lugá den gran forma i aparte di e agrupashonnan musikal manera Típiko Pasa Bon, Orkesta Vega i Arnel i Orkesta, AMAK k’e gradisí tur e kantantenan manera Gibi Doran, Urvin Jano, Melania van der Veen, Kenneth Hooi, Pastor Raul, Henry B, Wendy Jane, i e hóben kantantenan di Junior Allstar, kendenan ta bai interpretá un repertorio di 30 numero di añanan 40 pa 70.
Despues di e parti di e músika di ántes, e  segundo parti di e konsierto lo tin presentashon di Clinton Hato, Gems, Dibo Doran, Jaido i hinter e front di Buleria. Tur e kantantenan aki lo keda a kompaña pa Junior  All Star Orchestra bou di direkshon di Gedeon Chandler.
E chèri riba e bolo ta na momento ku Gustavo Semeler di Profesional Fire Works, los e vürwèrk, na momento ku Irvin Yano kanta e tumba di e aña aki, Sendé Sendé.
Direktiva di AMAK ta gradisí medionan di prensa en general pa nan sosten den promoshon di e Festival, un danki spesial na Radio MAS i TeleCuraçao i tambe un danki masha spesial na e patrosinadornan ku ta Prins Bernhard Cultuur  Fonds, ACU, CTB, UTS , Massive Productions i The Trader ku a hasi e proyekto aki bira un realidat.