WILLEMSTAD.- Den kuadro selebrashon 50 aña AMAK, AMAK i Instituto pa Formashon Musikal den koperashon ku Fundashon Tesoro ta regalá pueblo di Kòrsou un bankete musikal di vários género musikal di ántes i aktual.
Pa por realisá e proyekto aki, AMAK i Instituto pa Formashon Musikal a uni forsa ku Fundashon Nos Tesoro pa yega na e obranan musikal di nos antepasadonan.
For di un kantidat di mas ku 100 obra musikal a skohe un total di 22 komposishon, ku lo ser areglá pa Maestro Gedion Chandler den un bachi nobo, pero manteniendo e originalidat mas tantu posibel.
E repertorio aki lo ser interpretá pa diferente kantantenan hóben i adulto, i e kompañamentu musikal lo ta na enkargo di ‘Junior All Star Big Band’.
Pa e okashon aki Junior  Star lo konsistí di e hóbennan ku ya ta forma parti di e orkesta, miéntras e sekshon di brass, lo konsistí di e mihó profeshonalnan, huntu ku e studiantenan di brass.
Lo bai tin presentashon di: Típiko Pasa Bon; Orkesta Vega; Arnel i Orkesta ku Mafalda Minguel i Junior All Star Orchestra  kompañando nos artistanan lokal den 22 komposishon di añanan 40 pa 60, manera e.o.: Henri B, Gibi Doran, Irving Jano, Melania van der Veen, Ruth Samson, Ramsey Frans, Wendy Jane Gomes, Thallysa Jano,  Sukayla Gomes, Keenah Dammers  i Pastor Raul ku lo interpretá un òf mas komposishon.
E repertorio lo konsistí di  diferente komposishon, di e.o. Estrellas del Caribe, Lirico Antiano, San Jose, Jóvenes del Caribe, Kimo Candelaria, Happy Boys, Sexteto Gresssman, konhunto Cristal i Típiko Sta.Rosa
Ta bon pa  menshoná tambe algun di e títulonan: Ay ki redashi, Baila Tumba, Boca di tribon, Decepcion, E kakalakanan, Linda rosa de Avril, Riba dèmpel, Shi Maria, Kura di Maria, Chubatu di Sabana, Serafina den jet, Mesun Boka, Raspa Bil, T’asina mes i Barika hel.
Kantantenan di Kòrsou, Clinton Hato, Chèmsz, Dibo Doran, Jaido i e frònt kompleto di Buleria, tur lo keda kompañá pa e super orkesta di Junior All Star, bou di direkshon di Maestro Gedion Chandler.
‘Nos Rais Musikal’, un bankete di variashon musikal pa hóben i adulto, djadumingu 7 di òktober 2018 den Curaçao Festival Center pa 7.30 or di anochi.
Lo krea  un sètùp estilo anfiteater,  ku bon zonido i dekòr di iluminashon espektakular na enkargo di Massive Productions. The Trader lo tin e parti di bar i kushina na su enkargo. Lo no tin diferente sekshon, ku eksepshon di un “VIP Lounge” den un espasio limitá i reservá pa nos spònsernan, outoridatnan i invitadonan spesial.
Na final lo tin presentashon di Rei di Tumba Irvin Jano i show di vürwèrk di “Curaçao Professional Fireworks Display”.