WILLEMSTAD.- Patrick Martijn 12 aña pasá a start un proyekto bou dje nòmber ‘Nos Tesoro’ kaminda ku el a digitalisá 95% di nos produkshonnan, sea LP, kasèt, CD, reel to reel pa dje forma ei nan ta bon konserva. E último 5 añanan a kuminsá graba tur loke ta VHS hasi digital.
Den luna di Novèmber 2018 Patrick a kuminsá ku e programa ‘Nos Tesoro’ na TeleCuraçao. Den kuadro di esaki nos a kombersá ku Patrick riba e echo ku ‘Nos Tesoro’ a bai televishon.
“ Nos Tesoro ta un programa kaminda nos ta bai pasa dor di diferente programa ku a ser presentá na TeleCuraçao durante di 4 dékada.
Meta dje programa ta pa laga diferente generashon topa otro bèk bou di mes un dak i duna balor na nos presentadónan, komersiantenan ku pa hopi aña a sostené TeleCuraçao.
Nos lo bai pone énfasis riba programanan manera: Farándula: (Aktividat, Dimenshon Artístiko, Shownan musikal); Deporte: (Revista deportivo, Deporte Tele 8); Kultura: (Kachu, Tele Fiesta, Komedia); Notisia: (Resúmen di notisia, polítika, etc.); Propaganda: (spòtnan di añanan 70, 80, 90); Kulinario: (Kushina di oro ku Saida, i hopi mas) i
Talk Show: (Kontakto, Aktualidat).
Asina mi por sigui menshoná hopi programa ku nos lo bai presentá bèk, pero den un forma digital. Pa halsa kalidat di imágen nos lo trata di tene tur programa den na estado original pa asina e keda ku e mesun imágen ku tempu el a sera presentá”.
‘Nos Tesoro’ lo ser presentá pa Patrick Martijn i produsí pa TeleCuraçao i tin un durashon di 30 minüt.
Mas aleu Patrick a splika ku ‘Tur e programanan ku nos lo bai presentá ta wòrdu digitalisá dor di Patrick Martijn i ta bin for di archivo di TeleCuraçao (U - Matic) i grabashon nan hasi via (VHS) di kolekshon Nos Tesoro (Patrick Martijn).
Mi ta spera ku Nos Tesoro bira un programa ku hopi por siña for dje i balorá nos hendenan ku a nifiká hopi pe pais aki’, asina Patrick a terminá bisando.
Keda pendiente pa e edishon di Pasku i fin di aña, miéntras ku pa 2019 e intenshon ta pa presentá e programa 2 biaha pa luna, esaki tumando na konsiderashon e kantidat grandi di reakshon positivo.