WILLEMSTAD.- Riba djaweps, 9 di yanüari 2020, Alex Alberto Filmfonds ta presentá e pelíkula ‘Nostalgia: The Music of Wim Statius Muller’ den The Movies na Scharloo, esaki komo rekoudashon di fondo pa su aktividatnan.
E meta di e fondo ta pa duna sosten na produktornan sinematográfiko di Kòrsou den produkshon di nan proyektonan sinematográfiko.
Alex Alberto Filmfonds ta e promé fondo di pelíkula ku nan Kòrsou ku ta duna un aporte na e desaroyo di sinematográfiko na Kòrsou. Un aporte di e fondo ta duna e produktornan lokal sosten den desaroyo di nan plannan.
E fondo ta karga e nòmber di Alex Alberto, lokalmente konosí komo e pionero pa loke ta trata grabashon di eventonan importante i tambe pèrkurá pa e grabashonnan aki keda konservá pa futuro.
AAFF a skohe pa presentá ‘Nostalgia: The Music of Wim Statius Muller’, un dokumental riba e bida di Wim Statius Muller, un dje kompositornan i pianista di mas grandi di Kòrsou ku a fayesé e aña aki. E ta alabes un homenahe na e músiko ku a nifiká masha hopi pa e desaroyo i enrikesimentu di músika klásiko di Kòrsou.
Alaric Smeets, direktor i alabes produktor di e bunita dokumental aki a pone e pelíkula na disposishon sin gastu pa e meta di AAFF, motibu pa kual e organisashon ta masha gradesido.
E pelíkula lo keda proyektá den su format original. E presentashon spesial aki lo tuma lugá dia 9 di yanüari pa 7.45 di anochi na The Movies Scharloo.
Bo ke duna bo kontribushon na e desaroyo sinematográfiko di Kòrsou? Bo ke ta presente na e presentashon spesial aki di ‘Nostalgia’? Kumpra bo karchi na rason di 50 florin serka Curaçao Filmboard Foundation i serka e miembronan di AAFF.