WILLEMSTAD.- Un dje puntonan ku a bin dilanti durante di e evaluashon di Karnaval 2018 ta e echo ku ni maske kon bo organisá i prepará pa tur evento kuminsá na ora i transkurí sin niun problema tòg bo no ta logra, esaki debí ku no ta tur hende ta duna nan koperashon. ‘Nunka bo ta logra di komplasé tur hende’, esei ta loke ku Sr. Stanley Ignacio a pone énfasis riba dje. ‘E solo echo ku vehíkulonan no ta yega punto di salida 2 ora promé ku e marcha tin ku sali. E echo ku gruponan tin nan pensamentu i nan struktura ta pone ku difísilmente bo por imponé riba e gruponan’, ta djis algun dje situashonnan ku ta pone ku sea marchanan no ta sali na ora òf ta krea buraku durante dje marcha, asina Stanley a splika. Stanley a bai mas leu splikando ku tabatin sigur un kolaborador di Karnaval ku ta enkargá ku dirigí vehíkulonan den marcha ku a fada ku e manera ku shofùr di un vehíkulo tabata komportá su mes, dor di bisa e kolaborador ku e ta sigui instrukshon di e lider di grupo. E ekspreshonnan ku a keda kompartí dor di Stanley ta algu ku tur aña ta bolbe presentá nan mes i ta puntonan di atenshon ku mester yega na un solushon pa nan pa dje forma ei laga e marcha di Karnaval lusi aun mas tantu.