WILLEMSTAD.– E artista hóben Shamiro Anita ta lansá su kantika nobo nobo titulá ‘Nunka Entrega’. Despues di e hitnan manera “Move Tur Montaña”, “Un Brasa So Mi Ke”,  “Kalma E Tormenta”, i “Hala un Rosea” awor Shamiro Anita ta bèk pa motivá tur hende pa nunka nan entrega ni maske kon difísil e situashon ta.

Tin asina tantu tipo di situashon ku nos tur ta enfrentá tur dia ku por pone nos yega na e punto di entrega. Por ta situashon den nos famia, na trabou, na skol, ku nos negoshi. Ku e kantika nobo aki Shamiro ke sigurá nos ku nos NO mester entrega nunka! Dios semper tei pa yuda i motivá nos.

Letranan di e kantika ta bisa “Mi no lo entrega, Mi lo sigui perseverá! Maske kon duru e bataya, lo mi tin viktoria den e guera. Den Dios mi soñonan lo realisá. Mi no lo entrega. Mi lo keda konfia. Maske ku mi faya na kaminda, lo mi lanta para i sigui purba. Dios lo yuda mi logra mi meta”.

Shamiro su orashon ta pa nos tur por perseverá. Dios ta fiel i e tin un mihó futuro plania pa bo. Depositá bo fe den Hesus i nunka lo E faya bo. Di kurason, Shamiro ta spera ku mas i mas hende lo keda toka, animá i bendishoná ku e kantika nobo aki.

Shamiro ta gradisí Dios na promé lugá pa sigui yud’é logra su meta kual ta impaktá tur hende ku skucha su músika ku mensahenan positivo for di e palabra di Dios. Shamiro ta sumamente agradesido tambe na tur hende ku a yud’é i ta sigui sosten’é.

Ta trata aki di un kantika inspirativo ku un dushi melodia estilo Classical Pop / Balada. Pueblo por solisitá e kantika nobo na tur radio na Kòrsou, Aruba, Bonaire i Ulanda. Tambe por skucha e kantika nobo aki riba soundcloud https://soundcloud.com/shamiro-anita/nunka-entrega òf bishitá shamiro su página ofisial, www.shamiromusic.com, kaminda bo por skucha e kantika i tambe kumpr’é. Por kumpra e kantika tambe riba iTunes, Amazon, Spotify i Pandora.

Esaki ta e promé kantika di Shamiro su albùm nobo ku lo sali e aña aki. Pa mas informashon tokante di esaki bishitá Shamiro su Facebook Page: www.facebook.com/shamiromusic.