WASHINGTON, AP.- Eks presidente Barack Obama a elogiá manifestantenan ku a kongregá den diferente parti di e pais pa oponé kontra dekretonan di Donald Trump, relashoná ku e tema di inmigrashon. Esaki ta promé biaha ku Obama ta dirigí palabra tokante polítika desde ku el a bandoná su puesto komo presidente.

Obama “no ta niun tiki di akuerdo ku e noshon pa deskriminá individualnan a base di su fe òf religion”, segun indikashon di bosero di e eks mandatario, Kevin Lewis.

Den su promé deklarashon na nòmber di e eks presidente, Lewis a bisa ku Obama ta “sostené” e gran partisipashon di e komunidatnan di e pais. Lewis, un eks funshonario di Kas Blanku, a señalá ku Obama a usa su último diskurso komo presidente pa papia tokante e responsabilidat di Merka komo “guardian di demokrasia”, inkluyendo e añanan ku no ta di elekshon.

“E siudadanonan ku ta ehersé su derecho konstitushonal pa reuní, organisá i duna bos na funshonarionan skohe ta hustamente loke nos kier mira na momentu ku e balornan merikano ta na liña”. Asina Lewis a agregá.