WILLEMSTAD.- Resientemente e grupo di hóben United Generation, a duna nan presentashon final di e obra teatral “No Por” na teatro Luna Blou.
E meta dje obra aki ta pa habri komunidat su wowo i realisá ku tin sierto kosnan ku sigur “No Por” sigui asina riba nos pais.
Ehèmpelnan di kasonan ku “No Por” ku a keda trese den e obra ta: Fiesta di mucha a bira fiesta di hende grandi; Preis di kombustibel ta subi; Buraku riba kareteranan di Kòrsou; Bringamentu na skol; Tentamentu bou di hóbennan; Mal uso di medianan sosial; Ladronisia den pueblo; Daño di nos medio ambiente; Desunion den gobièrnu i parlamento; Mal uso di nos idioma; Sirkulashon di arma i droga riba Kòrsou; Benta di produktonan kaduká; Hòrtamentu di outo i Kanselashon di buelo.
Minister di Enseñansa, Siensia, Kultura i Deporte, sra. Marilyn Alcalá-Wallé tambe tabata tei presente i a felisitá i enkurashá nos hóbennan pa sigui ku e bon trabou. Huntu nos ta forma un unidat fuerte pa konsientisá i yuda nos pais progresá.