CARACAS, AP.- Ofisialismo venezolano, a disidí pa kuminsá un bataya nobo na defensa di memoria di e presidente ku a fayesé Hugo Chavez. Esaki ta debí na estreno di e serie di TV “El Comandante”.

“Miéntras nos ta sostené Chavez, e revolushon aki lo sigui”, asina diputado Diosado Cabello a indiká, despues di anunsiá lansamentu di un kampaña den organismonan públiko. Chavez a goberná Venezuela durante 13 aña i a muri riba 5 di mart na aña 2013 despues di kombatí kasi dos aña di kanser.

Produsí pa Sony Pictures Television, “El Comandante” ta wòrdu transmití via kananan TNT, RCN di Colombia, Telemundo i Televisa. Te ainda no a informá si ta transmití esaki na Venezuela, kaminda tabatin vários reakshon kontra e estreno.

Nicolás Maduro a kritiká e produkshon e luna aki sin menshoná e serie. El a bisa durante su mensahe anual na e pais ku “tin un porkeria ku ta bai wòrdu estrená. E novela aki ta un porkeria di bèrdat”.

Maduro, kende ta definí su mes komo yu di Chavez, a pidi su siguidónan pa kuminsá un “bataya” pa defendé memoria di e mandatario kontra e “medidanan kriminal aki”.

E eks kasa di Chavez, Marisabel Rodriguez, a bisa resientemente riba su kuenta di Twitter ku e ta dispuesto na demandá Sony pa e serie.