WILLEMSTAD.- E tékniko yu di Kòrsou Hensley Meulens, ofisialmente a keda nombrá bench coach di New York Mets. Ayera e ekipo a anunsiá e kuerpo tékniko ku ta bai ta esun ku ta guia e ekipo bou di mando di mènedjer nobo Carlos Beltran. E notisia aki ta konfirmá reportahenan ku Meulens tabata esun faborito pa haña e peusto komo bench coach di Mets. E yu di Kòrsou a fungi e último dos temporadanan na e mesun puesto ku San Francisco Giants i e ocho añanan anterior komo coach di bateo di Giants. Beltran a traha ku Meulens un periodo, despues ku e puertorikeño a hunga pa Giants den e último dos lunanan durante temporada 2011. Hensley di 52 aña, ya pa largu tempu a keda konsiderá  komo un potensial mènedjer i tabata parse di ta esun ku potensialmente lo a heredá e puesto di Bruce Bochy komo mènedjer. Tambe e tabata kasi kla pa djòin e kuerpo tékniko di Miami Marlins pero e ta regresá pa traha di dos bes na New York. Durante e periodo di 1989 pa 1993, Meulens a hunga su promé sinku temporadanan den Liga Grandi ku New York Yankees. Huntu ku Meulens den e kuerpo tékniko ta bai tin Chili Davis komo coach di bateo, Tom Slater coach asistente di bateo, Jeremy Hefner coach di picheo, Jeremy Accardo coach asistente di picheo, Ricky Bones coach di bullpen, Luis Rojas coach di quality control, Tony DeFrancesco coach di primera base i Gary DiSarcina coach di tersera base.