WILLEMSTAD.- Ayera e atleta kurasoleño Shurandy Doran a logra gana dos medaya durante di e evento di 'body building' Olympia Amateur 2021 ku a tuma luga na Orlando. Pa ta mas eksakto Shurandy Doran a kompetí den e kategoria Classic Physique. Extra ta pendiente pa risibí mas informashon tokante di Shurandy su prestashon i tambe pa tende kon a bai ku e dos otro kurasoleñonan Anthony Pieternella i Jimson Janga ku tambe kompetí den otro kategoria.

Riba djaweps 30 di sèptèmber Tres atleta di Kòrsou a sali di biahé pa Orlando, Florida, kaminda nan a kompetí den e kompetensianan di body-building i fitness amateur mas grandi di mundu, ku ta Olympia Amateur.

Tur e tres atletanan aki tin kompetensianan tras di lomba, mayoria bou di e federashon Europe IFBB Elite.  Por sierto ku Jimson Janga den esaki a gana su Pro-card komo body-builder. E atleta maskulino di mas hóben di e deporte na Kòrsou ku a gana su Pro-card.

Ku nan partisipashon, tur tres atleta a bai buska mas oportunidat den e federashon merikano mediante e konosido Olympia, ku normalmente ta tuma lugá na Las Vegas.

E kompetensia a tuma luga djárason 6 di òktober, na Orange County Convention Center na Orlando.