WILLEMSTAD - Ku motibu di un denunsia di infrakshon di e Lei di Integridat di kandidato pa Minister, Landsrecherche Kòrsou a hasi un investigashon penal. Entretantu e investigashon a terminá i Ministerio Públiko a evaluá esaki.

For di investigashon a resultá ku a keda sin mèldu un aktividat sekundario, òf a laga un aktividat sekundario sigui eksistí dor ku no a kanselá inskripshon di Kámara di Komersio. Estriktamente tumá, a aktua en kontra di e Lei Integridat pa kandidato pa Minister.

Mirando e tempu ku a transkurí den e kaso aki i e poko interes ku ta hustifiká persekushon, Ministerio Públiko a disidí di seponé i no persiguí e kaso.

Ministerio Públiko ta haña di gran importansia ku ta mantené integridat den maneho públiko. Ta esensial ku kandidatonan pa minister sigui regla i ta transparente pa ku nan aktividatnan sekundario. Ministerio Públiko lo sigui vigilá ku ta kumpli ku e Lei di Integridat di kandidato pa Minister i aktuá ora ta nesesario kontra posibel infrakshon.