GINEBRA, SUISA, AFP.- Organisashon Mundial di Salú (OMS) a klasifiká e variante di COVID-19 deskubrí na India (B.1.617) komo “preokupante”, pa motibu ku e ta mas kontagioso, segun informashon di e entidat djaluna.
“Tin informenan ku e B.1.617 ta mas kontagioso”, pero tin indikashon tambe ku e tin un grado di resistensia kontra e vakunanan desaroyá kontra e vírus. “I p’esei nos ta klasifiká e vírus komo un variante preokupante”, segun indikashon di dòkter Maria van Kerkhove, esun responsabel pa e lucha kontra COVID-19 di OMS.
E sientífiko a splika ku lo publiká mas detaye djamars den e informe epidemiólogo semanal di Nashon Uní, pero ku falta pa hasi hopi investigashon mas riba e variante. Ainda mester determiná e kantidat di e vírus ku ta sirkulando i efikasia di vakunanan kontraé variante.
“No tin nada ku ta sugirí ku nos diagnóstikonan, remedi i vakunanan no ta funshonando. I esei ta importante”, asina el a bisa insistiendo ku mester sigui apliká medidanan di salú manera distansiamentu sosial i uso di masker i limitashon di kontakto personal.
E variante aki ta un di e motibunan, pero no ta úniko, ku ta splika e brote di e vírus na India, kual ta foko di pandemia mas grave aktualmente. Segun statistik ofisial, mas o ménos 4.000 persona ta muri tur dia di COVID-19 na India, kaminda e konteo total di e epidemia ta kasi 250.000 morto.
