WILLEMSTAD.- Ayera nochi a tuma lugá na kas di Anselmus ‘Boy’ Dap un homenahe hasí dor di Dibo Doran i Randal Corsen esaki den kuadro dje produkshon musikal ‘Biba Boy’ ku agrupashon musikal ‘ONE’ a lansa siman pasá djaweps.
‘Biba Boy’ ta un sabor dje 10 tumbanan ganadó di e tata di tumba, Boy Dap.
Dibo Doran, na inisio dje homenahe a hiba palabra i a kompartí algun informashon dje proyekto ku ONE a hasi.
“Pa nos ta un plaser pa por a presentá e produkshon ku siman pasá ‘Biba Boy’ nos sa kiko Boy a nifiká pa Festival di Tumba, kuantu apoyo el a duna na Festival di Tumba. E mener aki a gana Festival di Tumba na 10 okashon. Boy ta un ikono na Kòrsou i den Reino Ulandes. Ora mi a trese e idea serka Maestro Randal Corsen, mesora el a brasa e proyekto aki i hasié su beibi.
Tur integrante di ONE tambe a brasa e proyekto aki. Ku hopi entusiasmo, ku hopi amor i kariño nos a hasi e dedikashon aki na nos Tata di Tumba, mener Boy Dap. Ta importante pa laga mi generashon sa kuantu i kiko e mener aki ta nifiká i lo nifiká pa Kòrsou su músika, tumba i Festival di Tumba en general”, asina Dibo Doran a terminá bisando.