WILLEMSTAD.- Awe e agrupashon musikal ONE ta estrená e videoclip dje kansion ‘Bellaciao’. Despues ku 2 luna paga a lansa e kansion e banda ta produsí un videoclip pa duna e produkshon un ‘second speed’.

‘DEN E BEMBE’ a kombersá ku Dibo Doran i el a indiká ku nan a produsí algu diferente, un video musikal manera un pelíkula kòrtiku, ku esena i aktuashon di e front dje banda. E videoclip ta duna un splikashon dje kansion.

E ‘script’ pa e videoclip a keda skibi pa Dibo Doran i Justin Kees konosí komo Ganja INC a hasi e produkshon visual.

‘E intenshon ta ku tur kansion nobo di ONE lo bin ku un videoclip, dje forma ei ta duna kada produkshon músika un tiki mas balor’, asina Dibo a splika.

E videoclip lo keda lansa riba e página di ONE riba YouTube promé, despues lo kompartí e videoclip riba sobra retnan sosial.