RABAT,MAROKO, AFP.- Operadornan di ‘tour’ marokano a protesta kontra gobièrnu su desishon pa sera frontera, i a pidi pa ”salba” e industria di turismo den e pais.

Alrededor di 200 trahadó a manifestá dilanti ministerio di turismo na Rabat, eksihiendo pa habri frontera i negoshá ku outoridatnan, argumentando ku e industria a “kolèps dramátikamente” durante e pandemia di COVID.  E manifestantenan a pidi pa “tene piedat di e ekonomia i e pueblo”.

Maroko a suspendé tur buelo di pasahero desde 29 di novèmber te ku 31 di yanüari dor di e oumento di infekshonnan di e variante OMICRON rònt mundu.

Lahcen Zelmat, direktor di e federashon nashonal di e industria di hotèl a bisa ku e situashon di turismo ta “katastrófiko” i a pidi pa habri fronteranan i duna “vrijstelling” di pago di debenan na banko.

Raja Ould Hamada, propietario di un agensia di biahe na Marrakech a bisa ku e desishon pa sera frontera resientemente tabata un “gòlpi fatal” pa e industria, afirmando ku otro paisnan kompetidó manera Egipto, Turkia i Emirato Árabe Uni a benefisiá.