WILLEMSTAD.- Despues di un tremendo temporada Praise Kids ta habri oportunidat pa miembronan nobo pa motibu di hopi petishon.
Praise Kids ta un “Praise Team”, kor di mucha ku ya ta konta ku un miembresia di 60 mucha di edat entre 4 aña i 18 aña. E muchanan tin hopi ánimo i meskos e mayornan.
Praise Kids tin solamente 1 aña di eksistensia i ya tin vários logro tras di lomba. Esun ku a lanta e grupo i ta para su tras ta Liesella Geertruida-Thomas. Ta un soño ku Liesella tabatin pa hopi tempu kaba di lanta un grupo grandi di mucha aki na Kòrsou.
E meta di ‘Praise Kids’ ta pa krea oportunidat pa na un manera edukativo muchanan por bini huntu i hasi loke nan ta gusta i eksperensiá esaki den e bachi artístiko pero tambe eduká e muchanan den diferente tópiko ku tin balor pa nan kresementu.
Pa forma parti di ‘Praise Kids’ e mucha no mester ta un kantante pero e mester gusta kanta. 2 biaha pa luna riba djadumingu atardi ‘Praise Kids’ ta bin huntu i ta hasi e parti di ensayo i edukashon. Pa mas informashon por yama Liesella Geertruida-Thomas na 515-9434 promé ku djárason, 1 di novèmber 2017.