MERKA.- E organisadónan di BET Awards ku djadumingu anochi a keda otorgá na Los Angeles, Merka a hasi nan máksimo esfuerso pa Chris Brown i su eks, Karrueche Tran keda for di otro. Resientemente Tran a pidi i risibí un prohibishon di kontakto kontra Chris via di korte.

Pa no laga e kantante keda sin kumpli ku lei, nan a laga Tran sinta den un sekshon apart te na momentu ku e mester a presentá durante di e show ku ta galardoná artistanan Afro Merikano.

Brown no a  sinta den e públiko, dje forma aki nunka e no tabata den e área di 90 meter manera e hues a indiká ku e mester keda di su eks kende a presentá un dje galardonnan.

Na kuminsamentu dje luna aki Brown a risibí un prohibishon di kontakto bálido pa 5 aña. Durante dje kaso a relatá diferente mensahe di SMS kaminda e artista ta menasa Tran pa hasi su bida imposibel. Entre e mensahenan tabatin tambe mensahe kaminda e ta menasa Tran ku e lo dal e.