KINGSTON, JAMAICA (AFP).- Te ku ayera tardi lat orkan Beryl a laga 5 morto den Karibe, miéntras ku el a baha un poko pa kategoria 4 riba kaminda pa Jamaica. Te ku e boletin di ayera tardi lat, e orkan a kousa sinku morto.
Segun e reportahe di outoridatnan dje region, e fenómeno a laga tres morto na Granada, unu na St. Vincent and the Grenadines i unu na kosta di Venezuela.
Sentro Nashonal di Orkan (NHC) merikano a indiká den su informe di ayera tardi ku ta spera ku Beryl lo debilitá ora ku awe e yega kostanan di Jamaica, pero a atvertí ku lo e bati e isla komo un tormenta pisá ku bientunan di gran potensia, hopi siklon i bastante áwaseru ku por kousa inundashon.
Ademas di Jamaica, tambe a emití atvertensia di orkan pa Cayman Islands i Rep. Dominicana. Instansianan dominikano a emití alerta kòrá pa e provinsianan di Barahona i Pedernales.
Despues di a pèrdè algu di intensidat den wikènt, Beryl a bolbe kue forsa ayera i alkansá e kategoria máksimo riba skal di Safir-Simpson ora ku el a yega e isla di Carriacou di 9.000 habitante den Granada.
“Den mei ora, Carriacou a keda destruí”, segun e promé minister di Granada, Dickon Mtchell, anunsiando tres morto.
Na nortost di Venezuela, den estado di Sucre, tambe un hòmber a pèrdè su bida ora ku el a keda lastrá den riu.
St. Vincent and the Grenadines tambe a sufri bou di bientunan inkreiblemente fuerte, segun e promé minister Ralph Gonsalves.
Barbados, e isla mas ost di Karibe, a salba i solamente a registrá bientunan fuerte i áwaseru torensial.
Ekspertonan a duna di konosé ku no ta normal ku un siklon asina potente ta surgi trempan den e temporada di orkan.
