WILLEMSTAD.- Fundashon J.A.G. a anunsiá ku Sr. Orlando Cuales ta e baluarte pa Karnaval 2018.
Don Orlando Cuales no mester di niun introdukshon pa loke ta trata Karnaval di Kòrsou. Komo lider di ‘Grupo Globo’ el a partisipá huntu ku e grupo for di 1971 pa 44 aña stret na Gran Marcha di Karnaval. Sirkunstansia a pone ku e grupo a stòp di partisipá.
Durante di su diskurso kòrtiku Don Orlando Cuales a indiká ku Karnaval tin e potensial pa logra masha hopi pa Kòrsou. Pa loke ta trata futuro di Grupo Globo, tur hende mester keda pendiente pa ‘E akademia di Alegria’ ku próksimamente lo anunsiá kiko ta e plannan pa ku e grupo di Karnaval.

‘Pilar di Karnaval’
Huntu ku e anunsio di ‘Baluarte di Karnaval’, J.A.G. a anunsiá ku M.C.B., Maduro & Curiel’s Bank a keda nombrá komo e ‘Pilar di Karnaval 2018’. M.C.B. pa añanan ta sostené Karnaval. Karnaval ta parti nos kultura i mester sigui traha huntu pa engrandesé nos Karnaval, asina Sra. Daisy Tyrol-Carolus kende a hiba palabra na okashon di e anunsio a enfatisá riba dje.