Strea Briante di nos Deporte...

WILLEMSTAD.- Orlando Clenton Nicolina ta un eks-pelotero di poder den beisbòl lokal. “Lando”, pa su amigunan i despues “Nico” den beisbòl, a nase riba 18 di òktober 1964 den Dein/Kanga. Su tata ta bini di un pais di beisbòl, esta Rep. Dominicana, i pa ser mas eksakto di San Pedro de Macoris ku ta un region ku a produsí masha hopi big leaguers.
Famia Nicolina despues a bai biba den Charo, Mundu Nobo, kaminda Nico a kuminsá hunga futbòl i beisbòl riba kaya bandá di kas ku bala di tènis. Kontrario na hopi otro pelotero ku a start na edat hopi hóben den beisbòl, Nico a kuminsá hunga beisbòl na edat grandi. E no tabata aktivo den Little League, sino den e dos último añanan ku e por a hunga na nivel di Senior. El a kuminsá den e team di Charo serka Cai Matrona. Semper e tabata dal e bala bon i tabata bati bon den clutch. Despues Nico a bai hunga den e team Coco Rico di Tonchi Martina (dfm). Tabata serka e persona aki ku su desaroyo den beisbòl a kuminsá. Ku tempu el a regresá den e team di Charo.
Na dado momento a surgi e pregunta, ken ta bai hunga den beisbol ‘AA’. Nico no a bin na remarke pa subi i a bai hunga den Liga Promoshonal ku Boca Stars, ku kua el a sali kampion bate.
Komo hóben el a yega di hasi try-out ku New York Yankees.

“Nico” den su añanan komo hóben pelotero.

Nicolina den Dòbel A:
E ekiponan di Santa Maria Pirates, Wild Cats i Royal Scorpions tabata interesá den Nico. Wenny Jakoba i Cedric Kirindongo –ambos di Wild Cats- a scout Nico for di Liga Promoshonal i komo tal no tabata straño ku e hóben a skohe pa bai Wild Cats na aña 1984. E tempu ei Gengu Hooi tabata manager di Wild Cats. Den su promé dos añanan ku Wild Cats, esta 1984 i 1985, Nico a yega playoff ku e ekipo pa despues den 1986 nan hunga final i a keda komo sup kampion di Kòrsou.
Den 1987 el a hasi un kambio di ekipo i a move pa e rival grandi di Wild Cats, esta Royal Scorpions. Pa un periodo di seis aña el a militá den Royal Scorpions Mr. Baseball huntu ku e.o. Marlon “Lonte” Balentin, Marlison Brigitha, Rudson “Ton” Roberto, Arthur Davelaar i Raffy “Poder” Jozefa. Despues na aña 1993 Nico a bai hunga den Groot Kwartier Stars.
Mas aleu el a yega di reforsá e ekipo di Sta. Maria den e torneo di “Campeon de los Campeones”. Nico huntu ku Arthur Davelaar tabata konosí komo e duo di poder na bate den beisbòl lokal. Nan tabata yama nan "Power City".

Ku Selekshon:
Na aña 1986 den Kampionato Mundial di beisbòl, Nico a hunga komo outfielder den selekshon di Antia Hulandes. Den Haarlemse Honkbalweek na Hulanda, el a konektá dos homerun den e wega ku Antia a gana Hapon 5-3 den Pim Muller Stadion.
Mas aleu e tabata ku selekshon di Antia den Weganan Sentro Amerikano i di Karibe di 1986 na Santiago de Caballeros na Republika Dominicana. Einan Antia Hulandes a gana medaya di plata.
Na Weganan Sentro Amerikano i di Karibe 1990, Nico a dal homerun pa Antia a gana Mexico 8-4. Tambe el a forma parti di selekshon di Antia Hulandes pa Weganan Panamerikano di 1987 i 1991.

El a forma parti di selekshon di Antia Hulandes, medayista na Juegos CAC 1986.

“Historia di Beisbol”
Na aña 1995 Orlando Nicolina a retirá, pero ni un aña no a pasa ku el a regresá pa duna un man na Groot Kwartier Stars. Esei tabata pa periodo kòrtiku. Despues di esei el a konsentrá riba algu diferente relashoná ku beisbòl. Atrabes di su karera Nico a dokumentá su mes ku historia i sifranan di peloteronan lokal. El a publiká e buki “Historia di Beisbòl”.

Logronan personal:
- 1983 Kampion Bate Liga Promoshonal ku averahe .417, 46 hit den 108 turno ku Boca Stars.
- 1987 Homerun King di Kampionato AA.
- 1988 Homerun King di Kampionato AA.
- Kampion Bate Torneo Willie Mr. Baseball Pieters
- Bateo averahe .467 (15-7), Torneo Campeon de los Campeones.
- 1991 Lider ku 25 RBI den kampionato AA.

Logronan ku ekipo:
- Medaya di plata den Torneo Campeon de los Campeones ku Sta. Maria.
- 1986 Sup Kampion Kampionato AA di Kòrsou ku Wild Cats.
- 1988 Sup Kampion Kampionato AA di Kòrsou ku Royal Scorpions.
- 1990 Kampion di Kampionato AA di Kòrsou ku Royal Scorpions.
- 1992 Kampion di Kampionato AA di Kòrsou ku Royal Scorpions.

Logronan ku Selekshon:
- 1986 Medaya di plata ku elekshon Antia Hulandes den Weganan Sentro Amerikano i di Karibe.

Artíkulo di prensa relashoná ku viktoria sorprendente riba Hapon.