WILLEMSTAD.- Ta inkreibel kon e konsiertonan di Maestronan Penshoná ta yena un bashí den nos pueblo. Djadumingu atardi den edifisio di PWFC tabata e di 12 konsierto di e grupo aki i un biaha mas e sala tabata “sold out”.
E alegria ku e piesanan ta duna e públiko presente ta algu ku bo no por distribí ku palabra. E konsierto aki tabata ripitishon di esun di desèmber último pero  apesar di esei hopi kara ku a bini na desèmber tabata presente atrobe den sala djadumingu último ei.
Kor Maestronan Penshoná ta sumamente kontentu di por trese alegria den nos pueblo spesial esunnan di 60 plùs ku di e moda aki ta haña un aktividat ku nan por bai riba un orario adekuá.
Manera ya a bira un kustumber kada biaha ta pone algun persona den spotlight i e biaha aki teniendo kuenta ku tabata siman di Hende Muhé a skohe 3 baluarte hende muhé di nos komunidat ku ta Mafalda Minguel, Elsa Martijn i Maria Diwan.
Nan tres no tin mester di ningun introdukshon. E bunita ta ku  tantu sra. Mafalda Minguel i Elsa Martijn a kumpli aña riba e dia 8 di mart ku ta fecha ku ta  selebrá dia di hende muhé. Mafalda a kumpli 80 aña i Elsa a kumpli 93 aña. Un pabien na e tres damanan  aki i riba e potrèt por mira kon nan ta lusi a apesar di nan edat respetá.
Tambe e Maestra di Seremonia, Sra. Grace Goede a haña un bunita buquet komo muestra di apresio pa e bunita trabou ku e a hasi durante di tur e último presentashon nan di e kor.  Grace tambe tabata maestra di skol.
Kor Maestronan Penshoná ta gradisí un i tur pa e akohida grandi ku e Kor a haña i ta pidi tur hende keda pendiente pa Desèmber próksimo  pa un repertorio kompletamente nobo.