WILLEMSTAD.- Fundashon Bon Intenshon i Curaçao Tourism Board a hinka nan skouder bou di e tremendo proyekto pa trese Kòrsou e legendario ‘Rhythm & Blues Cruise’. Espektativa pa ku e evento aki ta haltu pa mira sigur e impakto ku esaki lo tin i e posibilidatnan ku e lo habri pa mas dje tipo di eventonan aki tuma lugá.
Pa Ofisina di Turismo sigur esaki ta bira un evento ku nan lo por pone riba nan kalènder di aktividatnan i pa Fundashon Bon Intenshon lo e por bira un kombinashon perfekto pa Curaçao BlueSeas Festival.
Otro siman djamars, 24 di òktober 2017, e barku krusero ta yega Kòrsou ku 1800 pasahero ku ta inkluí 25 banda di Blues.
Huntu ku Fundashon Bon Intenshon nan ta ofresé Kòrsou presentashon di tres banda di Blues riba mesun dia.
Den Riffort Village lo tin for di 4’or di atardi presentashon di e 3 bandanan (artista di blues) ku ta: Samantha Fish i Mr. Sipp, ámbos artista  a yega di presentá na Kòrsou kaba durante edishonnan anterior di Curaçao BlueSeas Festival, i un artista/banda ku lo toka aki pa promé biaha ku ta Mississippi Blues Child ku Christone ‘Kingfish’ Ingram.
Nan lo kuminsá ku nan show for di 4’or di atardi i ta toka te 8:30 or, e momento ku nan mester regresá nan barku pa sali pa nan siguiente destinashon. Di e pasaheronan ta spera sigur alrededor di 500 persona, ku lo baha bin disfrutá di Willemstad, pasobra ya nan tabatin oportunidat pa gosa di e bandanan aki riba barku, miéntras nos di Kòrsou ta den e chèns úniko atrobe di disfrutá di dushi músika i interkambiá ku e bishitantenan aki ku ta bin disfrutá di e hospitalidat Kurasoleño.
Fundashon Bon Intenshon ta trahando en todo kaso riba un plan duradero pa frekuentemente nos mira Legendary Rhythm & Blues Cruise aki na Kòrsou i kisas asina tambe duna nos Curaçao BlueSeas un balor agregá.
Ban sostené e proyekto aki i disfrutá di e presentashon grátis di tres banda di Blues den Riffort Village.