AMSTERDAM.-Outoridatnan hulandes a bolbe detené un persona pa su supuesto embolbimentu den e kaso di asesinato di Peter R. De Vries. Ta trata di un hòmber di 27 aña di edat di Helmond. Outoridatnan no ta dunando muchu detaye di e persona.

Dia 6 di yüli 2021 a tuma lugá un atentado riba bida di e periodista hulandes Peter R. de Vries. Un hòmber a basha bala riba e periodista i algun ora despues el a pèrdè su bida den hospital na Amsterdam. A detené i entretantu sentensia a kai kontra di persona ku a tira i esun ku a kore e outo di huida. Polisnan a detené mas persona pa nan posibel embolbimentu den e kaso aki.

E hòmber di 27 aña ku a keda detené, ta kompletamente isolá i no por tin kontakto ku praktikamente niun hende. Solamente su abogado tin akseso na dje. Esaki ta e di seis persona ku a keda detené relashoná ku e kaso di asesinato di Peter R. de Vries.

Outoridatnan tin na bista fiha riba e akusado prinsipal den e kaso Taghi, sin embargo e echo ku anteriormente tantu ruman di e testigu di korona i e abogado a keda likidá ta pone ku hustisia hulandes ta sumamente kouteloso.