WILLEMSTAD.-  Djasabra awor 21 di aprel for di 2’or di atardi,  Union den Arte B.A.M.T.U lo tin un oudishon pa un show musikal turístiko den La Tentashon.
Franklin Salgado di Fundashon Arawak Teater a bin ku e inisiativa di traha riba un show turístiko ya asina turistanan i hende lokal por disfrutá di nos historia tres’é den un forma kreativo usando baile, kanto, músika, aktuashon i poesia.
Den pasado Franklin Salgado a traha algu paresido pa konmemorá 150 aña di nos Emansipashon. E la bin ku e idea di sigui elaborá mas riba e proyekto inkluyendo otro gruponan di teater manera United Generation, Mi Teater, Broche i TAG, huntu nan a bira Union den Arte B.A.M.T.U.
Mirando ku BAMTU ta kere den union, a pone un oudishon habrí pa tur esnan ku lo ke forma parti di e espektákulo aki.
E oudishon lo tuma lugá djasabra 21 di aprel na La Tentashon for di dos’or di atardi. Nos ta buskando hende for di 16 aña bai ariba ku lo por presentá den siman parti anochi i wikènt. Naturalmente bo mester por òf baila, kanta, aktua i kisas toka un instrumènt.
Por inskribí na Zona Kultural +5999 462-2209 òf por manda un mail na arawakteatro@gmail.com
Pa mas informashon tokante di e proyekto tuma kontakto ku: Franklin Salgado +5999 661-1058