WILLEMSTAD – Un aksidente di tráfiko a tuma lugá awe mainta pa mas o ménos 6:06 riba kaminda di Weg naar Westpunt, na altura di entrada di Landfill i pompstashon Beachstation. Aparentemente un shofùr lo a pèrdè kòntròl riba su vehíkulo i a bai bòltu ku esaki.

Segun informashon preliminar, un hòmber di edat ku tabata bini for di direkshon di Bándabou probablemente a bira malu durante e trayekto, a bai den di tráfiko kontrario i a dal kontra un outo bende, pa despues bai bòltu ku su vehíkulo.

Dos persona a resultá heridá den e aksidente. E outo ku a bai bòltu a terminá kompletamente ku su wilnan den laira kant'i kaminda, ku e shofùr pega den e vehíkulo.

Dos ambulans a presentá na e sitio pa atendé e personanan heridá. Bomberonan di unidat di Brantwer Mundu Nobo tambe a presentá pa asistí den e operashon di reskate.

Promé ku por a saka e shofùr for di e outo, bomberonan mester a stabilisá e vehíkulo pa garantisá seguridat durante e operashon. Despues nan a duna asistensia na personal di FKA pa saka e víktima for di e vehíkulo.

Riba e fotonan por mira kon e vehíkulo a sufri daño konsiderabel i kon personal di emergensia ta atendiendo un persona riba un brankar.

Te na e momento aki no tin informashon konfirmá tokante e estado di salú di e dos personanan heridá. Tampoko no ta konfirmá ainda si un problema médiko a kousa e shofùr pèrdè kòntròl riba su vehíkulo.