ULANDA.- E buki, DINO, outobiografia di e aktor i presentadó Jandino Asporaat, ku ántayera a keda lansá riba merkado na Ulanda, den 24 ora mester a pidi un di dos edishon di imprenta. Nienke Plas, Johnny de Mol, Philippe Geubels i Trijntje Oosterhuis tur a felisitá Jandino ku lansamentu di su buki ku un video kòrtiku. Jandino ayera mainta a pone un kompilashon di esaki riba Instagram, ku den korto tempu a akapará atenshon. Den ‘Dino’, Jandino ta konta pa promé bia di insidentenan den su bida i un karera eksitoso. Ku orguyo e ta kompartí e kaminda difísil ku e i su famia a rekoré. For di su infansia na Kòrsou te e inisio di su karera na Ulanda sin sèn i sin tata. Aserka e ta kompartí lèsnan di bida den e buki kaminda e ta konta kon bo por konstruí algu for di nada, semper ora bo lucha sufisiente. ‘Dor di skibi e buki aki ma haña mi obligá na kuminsá un kombersashon ku mi mes kaminda ma konfrontá mi mes ku etapanan di mi bida ku pa un òf otro motibu ma tene skondí i ku awor mi por a laga lòs’, asina Jandino Asporaat a splika.