WILLEMSTAD.- Color Events djasabra anochi a brindá e públiko ku a asistí na e konsierto ‘Furia Latina’ un espektákulo kompletu.
Nos artistanan lokal a demostrá ku nan no ta keda atras i popularidat di kada un ku a presentá a keda risibí ku aplouso i kanto di kansionnan ku a keda presentá.
E produkshon di ‘Furia Latina’ pe anochi aki no a spar nada, tremendo show di lus i led screen, vürwèrk i efektonan di huma tur a forma parti dje show, loke sigur a alsá e nivel dje show.
Presentashon di artistanan internashonal por keda evaluá dje siguiente manera, Plan B ta bon, nan ‘playllist’ no ta asina konosí i e reakshon di públiko no tabata tampoko loke ku nan a spera. Di otro banda Ozuna tabata simplemente ‘super’.
E hóben artista tabatin un tremendo presentashon, su banda a toka strak i su manera di presentá kombiná ku efektonan spesial tabata hopi bon sinkronisá loke a trese un ‘wow factor’ pa e show.
Públiko sigur a disfrutá i a kanta praktikamente tur kansion ku Ozuna a presentá. Un pabien na Color Events i Next Level Promotions pa duna pueblo di Kòrsou un tremendo konsierto, nan a kòrda riba delaster un detaye i un biaha mas e lugá di parker di Sambil a resultá e sitio ideal pa un konsierto. Pueblo di Kòrsou ta pendiente awor pa edishon number 2 di ‘Furia Latina’.