PUERTO RICO.- E portorikeño Ozuna djaweps pasa a dominá ku 6 galardon e promé edishon di ‘Premios Tu Música Urbano’, den kua a resaltá e 30 aña dje género i a eksaltá Daddy Yankee, indiskutiblemente e artista urbano ku e mayor renombre na nivel mundial.
Ozuna a gana e premio pa Artista di Aña, Artista Urbano Maskulino, Album di Aña pa ‘Aura’, Remix di Aña pa ‘Te bote’, Kolaborashon internashonal di Aña pa ‘Vaina Loca’ ku e kolombiano, Manuel Turizo i Video di Aña pa ‘El Farsante’ huntu ku e dominikano Romeo Santos.
Den e remix di ‘Te bote’ tambe ta aparesé e portorikeñonan Bad Bunny, Nicky Jam, Casper Magico, Darell i Nio Garcia.
Na momentu ku el a risibí e Album di Aña den e Coliseo de Puerto Rico Jose M. Agrelot de San Juan, Ozuna a indiká na e públiko presente ku no ta importá loke un persona a hasi den su pasado, ni loke a toka abo, importante ta loke e ta hasiendo aworakí’.
E deklarashon aki por ser konsiderá un reakshon riba e kontroversia di e video kaminda e ta aparesé ta masturbá pa un portal di pornografia homoseksual. Ozuna den un deklarashon anterior a bisa ku el a partisipá den e video pasó e tabatin mester di sèn pa mantené su famia.