WILLEMSTAD.- E kantante portorikeño Ozuna ta enkabesá ku 19 nominashon e promé edishon di ‘Premio Tu Música Urbano’, un evento di gala ku lo tuma lugá dia 21 di mart próksimo na Puerto Rico.
E 19 nominashonnan di Ozuna ta pa: Artista urbano maskulino, artista di aña, albùm di aña, 5 pa video di aña, 4 pa kansion pop urbano, 2 pa kolaborashon di aña, 2 pa remix pa di aña, kansion di aña, konsierto di aña i premio humanitario di aña.
E votashon pa kansion di aña, konsierto di aña i premio humanitario di aña lo ser hasí pa e fanátikonan di e género urbano via di plataformanan mobil i web.
Despues di Ozuna ta sigui Bad Bunny ku 14, Wisin i Anuel AA ta empatá ku 10, Daddy Yankee i Maluma tin 9 nominashon, e duo di Zion i Lennox, Nicky Jam i J Balvin ta empatia ku 8.
Otro artistanan ku tambe ta nominá ta Ricky Martin, Residente, Yandel, Becky G, Romeo Santos, Jennifer Lopez, Natti Natasha, Farruko, Brytiago, Nio Garcia, Casper Magico, Lyanno, Cardi B i Alex Rose.
E selekshon dje nominadonan ta basá riba ‘streaming airplay’, siguidónan i konsiertonan presentá pa e artistanan entre yanüari 2018 i yanüari 2019.