WASHINGTON DC,   Ozzie Albies a debutá den All Star Game ora ku den di 6 entrada el a drenta file na segunda base pa e ekipo di Nashonal League. Albies tabata masha kontentu di por a eksperensia e momentu grandi aki den Major League Baseball. “No ta fásil yega aki,”  asina e hóben pelotero yu di Kòrsou a bisa den Clubhouse despues dje partido. “Mi a kere ku e wega lo no a sigui mirando e kantidat di awa ku a kai den oranan di atardi pero e sistema ku tin na Merka pa ku parkenan di beisbòl, a pone ku fásilmente por a drecha e tereno pa e partido por a kuminsá normalmente. Ozzie Albies ta kere ku despues di e promé biaha aki,  di mes lo e traha duru pa e sigui bin All Star Game aunke ku no ta nada fasil. “Ora bo yega e promé biaha tin hopi atenshon riba bo, mi por a eksperensia esaki durante e  ‘Red Carpet Show’ . Albies a sigui komentá ku un sonrisa riba su kara.

Albies,  kende tin un swing no komun pero ku ta duna resultado inmenso, ta splika ku e ta bati kaminda e bala bin, “Mi a train duru den offseason pa mi por a konektá e bala kon ku e bin” Asina Ozzie Albies ta splika.

Ozzie Albies a kaba e promé parti di temporada ku un averahe di .283 loke ta normal den esun aña ku e ta bai hasi den Major League Baseball pero konektando 20 honron. Albies a debutá promé di ougùstùs 2017 ku Atlanta Braves i ya kaba sin kumpli 1 aña den Liga Grandi  e yu di Kòrsou aki ta den wega di tur strea di MLB. Ta bon pa splika ku pa bo drenta All Star Team bo mester tin sosten di fanátikonan i Ozzie Albies a bula 1 mion di voto sin niun problema loke ta un señal di e apresio ku fanátikonan di beisbòl na Merka i tambe esnan ku ta sigui e partidonan aki den eksterior tin pa e hoben aki.

Ozzie Albies lo biaha awe ku su famia bek pa Atlanta i pa fin di siman e kampionato ta sigui normalmente, Albies ta spera ku Atlanta lo sigui hunga den gran forma manera nan a  bin ta hasi esaki pa dje forma ei logra drenta postemporada 2018. Kenley Jansen no a tira ayera nochi, esaki el a bisa nos for di durante Red Carpet Show. El a tuma liber i a gosa di All Star Game i Ozzie Albies na segunda base palLiga Nashonal den un partido ku a konosé batasonan di kuater skina nunka bisto.