GEORGIA.- E gerente general di e ekipo di Atlanta Braves, Alex Anthopoulos no ta optimista ku Ozzie Albies lo por ta bèk ku e ekipo pa inisio di e serie divishonal.

E segunda base YDK no a hunga for di 17 di sèptèmber despues ku el a kibra su pink ora el a slais na tersera. Ozzie no mester a someté su mes na operashon, pero mester a bisti un yesu ku mester a kita kompletu despues di tres siman. E tres siman lo pasa ofishalmente e wikènt aki. Na e momento ei e organisashon di Braves mester evaluá e YDK pa wak ku e ta kla pa inisiá aktividatnan di beisbòl. Mirando ku Atlanta ta inisiá su partisipashon den postemporada djamars, kisas esaki lo ta muchu trempan pa Ozzie.

E gerente general di Braves Alex Anthopoulos tabata invitado den e podcast “Dukes and Bell ”kaminda e la elaborá riba e situashon di Ozzie. “Mi ta kere pa Ozzie hunga den e serie divishonal lo ta hopi difísil”, Anthopoulos a bisa. “Ozzie no ta batiendo òf nada otro den e último dianan, i ku e serie divishonal djis tras di lomba mi no por mira Ozzie ta kla.

“E serie di kampionato ta mas alkansabel pa Ozzie”, segun e gerente general. Pero opviamente mester gana pa yega einan Anthopoulos a bisa.

“Si Braves yega serie di kampionato, Ozzie lo ta un faktor pa nos”, e gerente general a siguí bisa. Esei ta úniko bon notisia ku tin awor aki rondó di Ozzie. Lo ta tremendo pa por haña un pelotero manera Ozzie pa e serie di kampionato, segun Anthopoulos a sigui bisa.

E temporada aki tabata unu hopi duru pa e orguyo di Koraal Specht. Ozzie e aña’ki a hunga apénas 64 wega. El a leshoná den e promé parti di temporada ku a pone, ku el a keda afó te luna di sèptèmber. Pero despues di apénas un wega el a bolbe subi lista di hungadó leshoná. Esaki despues di a kibra su pink.