WILLEMSTAD.- Vèlt di bala situá den Kaya Chi ku Cha, na Koraal Specht, a bira e siguiente fasilidat di deporte pa kua FDDK a firma un akuerdo di maneho ku un organisashon di bario. Ta trata di Union Deportivo Koraal Specht ku for di ayera ofisialmente tin e vèlt na su disposishon. E organisashon menshoná ta konta ku sosten di e pelotero di MLB Ozhaino “Ozzy” Albies, kende a lanta den Koraal Specht i ketu bai ta biba den e bario.
Direktor di FDDK, Vergilly Winklar, na okashon di firmamentu dje akuerdo a trese dilanti ku ta un dia spesial pa e bario komo ku ta dos vèlt tin ku lo keda drechá. E vèlt den Kaya Chi ku Cha lo keda kondishoná pa deporte di futbòl. Relashoná ku esaki, Albies a bisa FDDK ku ounke e mes no ta di e deporte di futbòl, e ke mira ku ta drecha e vèlt pa esnan di futbòl. Pa e motibu ei una bes ku e vèlt ta den bon kondishon, ta spera ku aki dies aña òf mas e bario lo por produsí hóbennan futbolista di taya manera ta e kaso ku Albies den beisbòl.
Mitchell Fonseca kende ta den e organisashon di bario, a trese dilanti ku algun aña pasá nan a purba drecha e vèltnan pero kos no a kana manera nan a deseá. Pa e motibu ei a lanta un organisashon i nan tin e konfiansa ku awor lo kana muchu mihó.
Ta e intenshon pa e vèlt por haña yerba artifisial i tambe iluminashon. Echo ta ku nan ke mira ku deporte ta lanta kabes den bario di Koraal Specht. Eksperensia ta mustra ku si no traha na interes di hubentut nos komunidat lo tin ku karga e konsekuensia. Pero awor ku ta bai drecha e fasilidat aki, por bisa ku ta traha riba futuro di hóbennan dje bario kendenan ke hasi deporte.

...Momento ku Ozzie Albies, mucha di Koraal Specht, a pone su firma bou dje akuerdo...