WILLEMSTAD.- Diferente polítiko ayera a reakshoná riba opinion di lider di frakshon di partido MFK, Amerigo Thode. Manera ta konosí EXTRA djaluna último a skirbi ku segun Thode ‘Ministerio Públiko ta ketu i no ta aktua den insulto i falta di rèspèt kontra promé minister’. Thode a pidi pa OM tuma akshon. Pasobra, segun e lider di frakshon di MFK insultá i falta rèspèt na minister-presidente ta grave, prinsipalmente ora esaki ta bin for di un supuesto lider polítiko manera sr. Elvis de Andrade i otronan ‘ku ta hasi nan mes kulpabel na tipo di aktuashonnan denigrante asin’aki.’

EXTRA djaluna a haña diferente reakshon di hendenan ku ta bisa ku den e último añanan ambiente den nos mundu polítiko a bira basta agresivo. Pa hopi di nan esaki a bira di mas. ‘No ta niun problema pa debatí na un manera fuerte, pero nos tin ku keda sivilisá’ un di nan ta bisa. Diferente parlamentario djaluna tambe a reakshoná riba e situashon, entre otro lider di frakshon di partido PAR Quincy Girigorie. Pero tambe parlamentario i eks-presidente di Parlamento Ana Maria Pauletta a duna su opinion. Segun Pauletta ‘a bira un kustumber ku ta keda tolerá, ku ta insultá i asta menasá promé minister, otro ministernan i parlamentarionan. Esaki ta algu ku nos no mester aseptá, e no ta akseptabel pa niun otro hende. Nos por tin desakuerdo riba kontenido, pero insulto i menasa si no!’

Lider di frakshon di KEM, Michelangelo Martines, tambe a reakshoná. El a duna di konosé ku e no ta di akuerdo ku e yamada di Thode. Segun Martines el a keda ‘den shòk skuchando un kolega parlamentario tildando OM di no ta midi ku e mesun midi i despues pidiendo OM pa persiguí i kuminsá investigashon kontra personanan ku a bini ta difamá i insultá mama di nos Promé Minister.’ Martines ta bisa ku el a keda den shòk ora el a mira ‘ku e petishon aki ta keda hasí di parti polítikonan ku tabata forma parti di oposishon 4 aña largu kaminda nan a aportá e tempu ei en grandi na tur e tipo di insultonan i bagamunderianan aki kontra e Promé Minister Rhuggenaath.’ Frakshon di KEM ta di opinion ku polítikonan di MFK ta kulpabel ‘ku awe no tin niun klase di rèspèt pa nos Mandatarionan.’ Riba su página di Facebook Martines ta skirbi e dicho: ‘Loke bo sembra bo ta kosecha!’

Ministerio Públiko a reakshoná riba e situashon. Den e kaso di insulto kontra minister-presidente Pisas Ministerio Públiko na promé instansia lo wak si e persona enbolbí a hasi denunsia.