WILLEMSTAD.- Awe nochi 8 or lo tin e sendementu di lus di e pesebre na Montaña. Pa 15 aña kaba Nantje’s Crew ta dediká nan mes na konstruí un pesebre i e atrakshon prinsipal ta e animalnan bibu ku tur aña tin aden.
Lokual ku ta hasi e pesebre aki úniko i diferente ta ku e ta un bunita obra di papel i ta traha ku materialnan resiklá.
E aña aki e sendementu di lus di e pesebre ta dediká na medionan di prensa den su totalidat, Coca-Cola, Kara production i kor Los Carmelitas. Esakinan lo bai risibí nan rekonosementu serka e organisashon di Nantje' Crew na Kaya Kane, e hanchi pabou di toko Jomali na Montaña.
Kuminsando 8 or di anochi lo bai tin un marcha protokolar ku tur e baluartenan kompañá pa un grupo di brasbènt i tambe lo bai tin animashon di Kor Los Carmelitas i grupo di tambú Dal Pega.
Bin unu bini tur pa asina nos por aploudí i sostené e hóbennan di Nantje's Crew ku ta hasiendo un tremendo trabou den e aria di Montaña, Bandariba i bisindario.
For di awe, djasabra dia 8 di desèmber te ku djadumingu 6 di yanüari komunidat kompletu ta keda kordialmente invitá pa por pasa atmirá e bunita obra di e hóbennan di organisashon di Nantje's Crew.