WILLEMSTAD.- Durante di e estreno di Shamiro Anita su buki nobo titulá “Move Every Mountain” lo tin oradornan di Merka, Papa New Guinea, Aruba i Kòrsou ku lo presentá ku spichnan di motivashon tokante di e tremendo buki aki.
For di Kòrsou lo tei entre otro e oradornan L. Davelaar, J. Martina, M. La Roch, S. Isabella i  K. Thijm. For di Aruba lo presentá J. Kelly. Direktamente for di Papa New Guinea M. Kaun Temo i direktamente for di Merka lo tei J. Hembree.
Ta trata aki di personanan di diferente gremio i ku diferente konosementu i eksperensia. Den nan tin entre otro Abogado, Tax Consultant, (eks) Kapitan di barku, Pastor, Misionero, Negosiante i un Hóben ku a kaba su estudio.
Sub-título di e buki ta “Overcoming 15 of Life’s Toughest Challenges”.  P’esei kada un di e personanan aki lo duna un spich di motivashon splikando kon pa surpasá un òf mas di e 15 montañanan aki ku nos tur por enkontrá i ku ta forma momentunan duru i difísil den bida.
Estreno di e tremendo buki aki lo tuma lugá djasabra 11 di ougùstùs 2018  den SAMBIL su Event Hall di 7’or pa 9.30’or di anochi. Tur den un ambiente dushi i bendishoná kombiná ku kanto, baile i presentashon di otro artistanan invitá. Henter pueblo ta invitá i entrada ta grátis. Por spera un sala yen yen, p’esei ta importante pa yega trempan pa haña un bon lugá di sinta, gosa, siña i disfrutá. Na final di e evento lo tin posibilidat pa kumpra e buki i laga Shamiro firm’é.