WILLEMSTAD- Den Bembe ta sigui riba su ruta kayente buskando informashonnan i un di e tópikonan ku tur hende ku ta gusta nan festival di tumba kier sa, ta  kon kos ta pará pa asina aña habri ora ku tin e festival tan kotisá aki ku ta festival di tumba 2018.

Manera ta konosí for di aña pasa UTS a anunsiá ku nan lo no kontinuá mas komo e produktor di e festival i a hala atras pa duna otronan ku ta bringando pa e oportunidat aki hasi esaki. For di e momentu ei AMAK a hañ’e den un dilema ku te ainda nan ta kibrando nan kabes riba dje.

Nan a kòmbersá ku diferente instansia i tin gruponan ku ta reuniendo forsa pa hasi esaki. Sr. Gomes no kier a bai den detaye ken ta e personanan i òf instansia ku kier hasi esaki, pero den nos investigashonnan nos a bin komprondé ku tin hendenan den media ku kier tuma esaki i ta formando nan grupo i banda di esei tin un kompania di zonido ku tambe ta sondia e posibilidat pa produsí esaki i nan tambe ta kombersando ku un kantidat di grupo basta fuerte.

Te na ora keda kla ku e grupo ku lo bai produsí mester bai reunion general di miembronan pa por haña e outorisashon di miembresia pa por aseptá un dil nobo. Si esaki no logra tin un plan B di akuerdo ku Manfred Gomes presidente di AMAK.

Tuma nota ku inskripshon pa festival di tumba ta dia 15 di yanüari 2018 miéntras ku festival di tumba mes ta dianan 23, 24 i 25 di yanüari pa loke ta e anochinan preliminar i e anochi final ta 27 di yanüari kaminda nos lo tin un rei òf un reina di tumba 2018.