WILLEMSTAD.- Kuerpo di Bombero Kòrsou, Kuerpo Polisial di Kòrsou, ROP i tambe Prekario ayera durante di oranan di anochi a tene e último Inspekshon di e ruta di karnaval pa loke ta trata karnaval 2018.
Durante di e inspekshon manera ta e kaso tur aña ta wak estado di e edifisionan entre otro i tambe si no tin ningun peliger riba e ruta.
Durante di e inspekshonnan a konstatá ku tin dos kas ku por kousa peliger.
Un di nan ta abitá pa un persona di 85 aña pero e kas aki no ta niun tiki apto pa hende biba aden.
E ta kousa peliger pa e habitante mes i tambe esnan ku ta frekuentá den e área.
E otro kas no ta riba e ruta di karnaval mes pero si den e área.
Pa e kas aki ainda desishon mester keda tumá pa wak kiko lo bai hasi ku esaki.
Tambe Kuerpo Polisial a yega na e desishon ku e krusada Roodeweg/Boerhaavestraat ku ta e kaya nèt kaminda ántes tabatin e edifisio di Marlboro lo bira kaya prinsipal di emergensia.
Pues pa e próksimo Karnaval NIUN vehíkulo partikular no mag ta stashoná mas den e kaya ei.
E kaya lo mester keda kompletamente liber, pa si algu sosodé, tur vehíkulo di emergensia pasa via e kaya ei, pa bai Otrobanda òf Domi Abou etc.
Aparte di esakinan tambe a yega na e desishon ku doñonan di Pòmpnan di gasolin Sta. Maria, Kas Chiki, Scheidelaar i tambe e pòmp di gasolin na Colon mester sòru di sera e área ku Bouwhek pa evitá aksidente i mester kumpli ku e eksigensia aki den areglo ku organisadó di karnaval ku ta Fundashon J.A.G.