WILLEMSTAD.- Mañan djamars, 14 di novèmber, 2 persona ku tela di bos inigualabel, lo bai topa otro pa promé biaha den e sala luhoso di e barku Freewinds.
Ta trata aki di 2 generashon: e gran artistanan Romeo Heije i Amadeus Mellinger “Boy” Thodé.
Na vários okashon, e dos artistanan di taya aki a yega di presentá huntu ku mas artista, pero nunka promé a yega di presentá nan 2 so.
Mañan anochi, amantenan di piesanan na nivel i romántiko tin e suerte pa mira e 2 titan nan aki batayá kontra otro. Kua di nan lo haña mas aplouso? Kua di e 2 artistanan aki lo logra pone e damanan kai flou?
Esei nos tur lo mira mañan anochi durante e gran show ku e duo aki lo presentá.
The Freewinds Band lo kompañá e artistanan aki.
Karchinan pa e konsierto aki a bai hopi lihé i a manda produsí un kantidat chikí aserka pa kumpli ku e demanda ku tin, mirando e akohida ku e show aki a haña.
Pa karchi, por tuma kontakto na numbernan di telefòn 511-3433, 560-0686 òf 662-7828. E show fenomenal aki ta pa rekoudá fondo pa ‘Fundashon Nos Grandinan’
Show ta kuminsá pa 8’or di anochi i lo terminá 9.30pm.
Hasi lihé buska bo karchi, pasó ora e kantidat chikí ku a manda traha kaba, lo no por manda traha mas. Wak pa Bo ta den!