KRALENDIJK – Seis aña a pasa sin ku polis te awe por a solushoná e kaso grandi i lamentabel di sabotahe na un kabel prinsipal di elekrisidat di WEB N.V., kousando interupshon di koriente práktikamente rònt e isla. Ku tur spesialishon ku KPCN tin, ku tur téknologia moderno di investigashon tékniko disponibel, e kaso ei ainda ta sin solushon.

Tabata probablemente djasabra dia 2 di yanüari mardugá 2016 ku deskonosínan a sabotiá e kabel prinsipal di elektrisidat ku ta sali for di e planta di ContourGlobal pa áreanan residensial di Boneiru.

Preokupante

Un entrada di aña preokupante, ku preguntanan manera ken por a hinka den nan kabes pa hasi algu asina? E sabotahe a tuma lugá a lo largu di un kaminda di tera ku ta kore pa nort di Karpata bai direkshon di Ser’i Sùit. Un sitio alehá na unda e sabotiadónan por a hasi nan trabou den tur trankilidat. A koba alrededor di un parti di e kabel i a send’é kandela.

Boneiru a hala rosea di alivio ora ku gerensia di WEB N.V. a anunsiá un dia despues ku kitamentu kompletu di koriente na Boneiru lo no tabata nesesario mas, manera tabata parse na promé instante.

Intenshonal

Direktor finansiero di WEB seis aña pasá, Albert Schoonderbeek, a bisa ku tabata un akshon konsiente i intenshonal pa a hasi daño na e ret di distribushon di koriente na Boneiru. El a bisa ku suministro di koriente lo ta garantisá despues di e sabotahe djasabra 2 di yanüari 2016.

WEB a tuma e kaso aki hopi na serio. A denunsiá e suseso na Kuerpo Polisial Hulanda Karibense (KPCN). Schoonderbeek a bisa ku a hasi hopi esfuerso pa hasi daño na e ret di koriente.

Produktor di elekrisidat ContourGlobal i WEB tabata teme ku e kabel ‘backup’ di tenshon haltu tambe lo tabatin daño serio. A logra remplasá despues e kabelnan aki sin ku mester a kita koriente riba e isla kompletu.

E kriminalnan tabatin konosementu di e situashon, pasobra bo mester sa kon e trayekto di e kabel ta kore. E mènedjer e tempu ei di e ofisina empresial di WEB, Roy Silberie, tambe tabata kombensí di esaki.

Polis

Polis a kuminsá ku un investigashon e tempu ei, pero te awe, seis aña despues, sin solushon. Pregunta ku ta biba den komunidat ta kon bini KPCN, un kuerpo ku por konta ku tur sorto di ekspertisio hulandes, no por a solushoná e kaso aki, ku mientrastantu a bira un asina yamá ‘cold case’. No ta un suseso ku ta sirbi komo dekorashon pa KPCN.

E sabotahe aki a tuma lugá durante e periodo ku integrantenan di e movementu ‘Nos Ke Boneiru Bèk’ (NKBB), bou di guia di James Finies, tabatin un akshon dilanti ofisina di gobièrnu. Un di e personanan embolbí den e akshon aki tabata Uz Everts. Tabatin sospecho ku NKBB, òf en todo kaso Uz, lo tabata embolbí ku e sabotahe aki.

Den e programa ‘Aktualidat’ ku ta kuminsá pasa awe na Bonaire.tv pa diesdos’or di mèrdia, ku ripitishon na diferente orario durante tres dia, Uz Everts ta bisa ku e nota metí den e kaso. Su alibi tabata ku na momentu ku e sabotahe a tuma lugá e tabata na e sitio di demonstrashon di NKBB dilanti Bestuurskantoor.