WILLEMSTAD.- Dia 2 di aprel último Kousa Promé a organisá un “Fiesta di pampuna” ku e meta pa konsientisá pueblo riba importansia di produkshon di nos propio kuminda i alabes promoshon di kreatividat riba tereno kulinario. Kousa Promé a hasi uzo di un kantidat grandi di pampuna produsí lokalmente pa prepará diferente produkto manera pan, pandushi, djèm, tèrt, eiskrim, bolo, pika. Tur trahá di pampuna. Otro delisianan di pampuna konosí manera stobá di pampuna, sòpi, repa, tambe a forma parti di e fiesta. Pueblo a akudí na gran kantidat i tabata hopi enkantá ku e aktividat i e produktonan. Esaki ta muestra ku pueblo di Kòrsou ainda ta duna balor na nos kumindanan krioyo. Kousa Promé a selebrá e echo ku kunukunan di Kòrsou a produsí asina tantu pampuna ku por a tene e fiesta aki.

Marcha di seú
Djadumingu ultimo tabatin e marcha tradishonal di seú. Kunukunan di Kòrsou a produsí e aña aki. Esaki ta nifiká ku e marcha di seú di ayera den kayanan pabou di brùg mester tabatin abundansia di produkto di nos suela pa demostrá. Pasobra e parti mas esensial i profundo di seú ta risibí e grano, fruta i bèrduranan i gradisí Dios pa e kosecha. Na momento ku a lòs seú for di plantamentu el a pèrdè su esensia.
Den preparashon di e gruponan pa e marcha di seú ban duna mas atenshon na plantamentu den e konteksto di outonomia alimentisio. Kòrsou komo isla no por keda dependé di importashon di tur loke e ta kome. Kòrsou mester por produsí un parti esensial di su propio kuminda. Un maneho asina lo ta sostenibel i aploudibel. E marcha di seú ku partisipashon di hubentut ta ideal pa stimulá e proseso aki.
Dikon no mara e marcha di seú na plantamentu i produktonan di kunuku i di hòfi?
Dikon no mara e marcha di seú na plantamentu moderno aki na Kòrsou? Dikon no ta instruí e kulturistanan di seú pa hasi uzo di e marcha pa demostrá kosecha di nos suela? Por asta instituí un premio nobo pa e kosecha mas abundante den e marcha.

Ban planta pa yama danki
Kousa Promé ta kere firmemente den seú, e rito di gradisimentu pa e kosecha risibí. Pa e motibu aki Kousa Promé ta dispuesto na duna su kontribushon. Nos ta boga pa for di momentu ku sera e periodo di seú hinka un plan di formashon den otro. Un plan kaminda ta plama konosementu pa hóbennan riba tereno di koperativa i plantamentu moderno. Ta brinda hóbennan formashon práktiko pa nan siña planta na kas i planta huntu riba terenonan ku gobièrnu ta pone na nan disposishon i di nan grupo.
Hasiendo esaki ta lanta interes i promové poko poko pero sigur produkshon di propio kuminda. Komo ku hóbennan ta asina interesá por kuminsá e era di outonomia alimentisio hasiendo uzo di nan entusiasmo pa seú. Otro benefisionan ta bahamentu di gastu di pais, kreamentu di trabou pa yunan di tera, mihó kalidat di produkto i konsekuentemente promoshon di bon salú di nos pueblo. E resultado final lo ta un marcha di seú real kaminda ta gradisí Dios pa loke nos suela a produsí.