WILLEMSTAD.- Durante fin di siman Pacheco Domacassé a tuma despedida di Lidernan di Grupo di Seú, despues di a liderá e magno evento di ‘Festival di Seú’ pa vários dékada.
Den e kuadro aki el a trese dilanti ku tin diferente motibu ku a kondusí na su desishon pa retirá; entre otro su edat. E motibu mas importante sin embargo, el a formulá komo siguiente: “Responsabilidat di un berdadero lider ta bai dje leu ei ku e mester sa ki ora su momentu di bai a yega i pasa e torcha pa otronan mas hóben”.
Tabata un momentu bastante emoshonal kaminda vários lider a hiba palabra i gradisí Pacheco pa e bon trabou ku el a desplegá na bienestar di Festival di Seú i kultura en general. Un ekspreshon ku práktikamente tur Lider a menshoná komo un di su kualidatnan mas atmirabel ta su sentido humano profundo, su rèspèt sosial i su humildes.
Finalmente diferente Lider ta supliká Pacheco pa e no disparsé kompleto, pero pa e keda komo konsehero. Pacheco a trese dilanti ku el a haña e mesun petishon di parti di e Direktiva di Fundashon Seú i vários otro persona den komunidat i ku sigur lo por konta kuné tras di kortina. Terminando Pacheco ta introdusí Sr. Lionel Jansen komo e Presidente nobo di Fundashon Seú, bisando ku Sr. Jansen a keda skochi a base di un lista di kriterio, konsistiendo di múltiple punto. Den e mesun rosea e ta ekspresá tambe su konvikshon ku Sr. Jansen lo hasi un bon trabou komo Presidente nobo.