TEXAS.- Sharnol “Pachito” Adriana pa di dos temporada siguí lo tin trabou den e organisashon di Texas Rangers komo coach di bateo. E eks-pelotero internashonal di Kòrsou lo bai traha ku e team Hickory Crawdads den Klase-A.

Pachito Adriana (46) den luna di yanüari dje aña’ki a drenta servisio di Texas Rangers, despues ku e temporada anterior e tabata pa un periodo kòrtiku ku Los Angeles Dodgers.

Pa Rangers el a debutá den Minor League komo coach asistente den e team Klase-A Frisco RoughRiders ku a finalisá na di kuater i último puesto den Texas League South.

Pa e próksimo temporada tambe Adriana lo ta ku Rangers, komo coach di Hickory Crawdads ku e aña’ki a kaba na di tres lugá den South Atlantic League Northern. Den e team aki lo e bai traha bou dje manager Spike Owen, kende e aña’ki temporalmente tabata coach di tersera base di Rangers den MLB.

Karera komo pelotero i tékniko:

Pachito Adriana den 2014 na edat di 43 aña a pone punto final na su karera komo pelotero aktivo. El a hunga su último temporada ku Broncos de Reynosa, na México.

Despues di esei el a bira manager di Rojos del Aguila de Veracruz den Liga Mexicano i Chileros de Xalapa den Liga Invernal Veracruzana. Tambe mas despues el a traha komo coach di bateo di Yaquis de Ciudad Obregón den Liga Mexicana del Pacífico.

Komo hungadó, Pachito Adriana entre 2001 pa 2009 a militá den selekshon di Ulanda i a hunga 135 wega ku esaki. El a partisipá entre otro na Weganan Olímpiko di 2004 i 2008 i World Baseball Classic di 2006 i 2009.

Su karera a dura for di 1991 te ku 2014.