WILLEMSTAD.- Pa tradishon 31 di desèmber e aña ta wòrdu será ku e fiesta di pagara ‘Pagara Party XXL’ den Pietermaai district. E bario a uni forsa pa bolbe hasi e selebrashon di fin di aña un tremendo fiesta ku e tradishonal pagara di mas largu di Kòrsou, for di Scuba Lodge te ku ‘Cafe de Tijd’ e ambiente lo dura te den oranan lat di anochi.
E aktividatnan den Pietermaai ta kuminsá for di 12 or di mèrdia. Pa 3 or di atardi e pagara di 15 mion klapchi i ku un largura di mas o ménos 1.5 kilometer lo keda sende na Scuba Lodge. E pagara ta sigui su kaminda dor di Pietermaai te na Cafe de Tijd.
Tur e establesimentunan di Horeca riba e ruta lo sòru pa animashon musikal, ko’i kome i bebe. Algun dje establesimentunan lo sigui ku ambiente musikal te den oranan lat di anochi. Na Cafe de Tijd lo tin un tremendo fiesta ku animashon di dj Wakkere Joris, dj David Gitaar  i Dj Sento. Scuba Lodge for di 1’or lo tin animashon d dj Double D. Na Cafe Old Dutch durante henter dia lo tin ambiente i for di 3’or di atardi muzik bibu ku animashon di Roadhouse.
Mundo Bizarro no ta keda atras, serka nan lo tin animashon di Happy Peanuts, Plane i Charming Bastards i pa 7 or di anochi e selebrashon di kambio di aña di Ulanda.
Relashoná ku e preparashon di ‘Pagara Party XXL’ lo sera Pietermaaiweg dia 31 di desèmber for di 12 or di mèrdia. E organisashon ta spera un públiko grandi den Pietermaai District, motibu pa kua lo tuma medidanan èkstra di seguridat i lo pèrkurá pa entre otro porta potty na diferente kaminda.